فيلي بالاڢوكا بالصور من مطبخي

اليوم ان شاء الله غاديا نزل واحد الوصفة كنت شفتها فالتلفاز وقلت نجربها وفعها جات لذيذة ووجدات فوقت قياسي، وزيد عليه المكونات كانو بساط و من الموجو فكل دار ، نقولو بسم الله ونبداو

المقادير:
3 شرائح صدر دجاج



بصلة ونصف طويلة، او بصلة مقطعة على 3



طريفات ديال اڢوكا



معدونس



ملح كمون ابزار اسكنجبير كيري



زيت ارڭان
فلفلة حمرا حارة او صلصة حارة



ورق الومنيوم



مرافق: ارز ضامة البنة وهذا اختياري







الطريقة :

ناخذو كاسرولة نديرو فيها الارز وضامة البنة ونخليوه يتسلق،
مللي يوجد نصفيوه ونخليوه على جنب

ناخدو شريحة الدجاج وندقوها براحة اليد باش تتسطح شوية ، ولكن عنداك تتقطع



من بعد ناخدو الصلصلة الحارة وندهنوها بيها والكمية حسب الرغبة



من بعد نضيفو شوية ديال الملح



شوية الكمون



شوية ديال الابزار



شوية ديال اسكنجبير



شوية ديال الكيري



من بعد نزيدو المعدونس



ونحطو طرف ديال البصلة



ونحط فجناب البصلة 2 طريفات ديال الاڢوكا

من بعد نلفو الشريحة ونغلفوها بورق الومنيوم،



ندوبلو الورق و نسدو مزيان باش مايدخلش الما للشريحة فالطياب



ناخدو طنجرة ونديرو فيها الماء يغلى،



مللي يغلى نحطو فيه الشرائح ونخليوها تطيب 10 ديال الدقايق،



مللي تطيب، نزولوها من الماء ونقطعوها من الوسط فحال الپانيني، ونقدموها مع الارز اللي سبق حضرنا،



او نقدموها وحدها : ناخدو طبسيل التقديم ونزوقوه شوية فحال الصورة،



انا ماتنعرفش بزاف نزوق ولكن غير محاولة وعوضت زيت ارڭان بزيت العود لانو ماكانش عندي









وبالصحة والف راحة

في آمان الله