اهلا وسهلا حبيباتي
البارح درت طاجين ديال الحوت، اول مرة
جا بنين ولكن شكلا الله اعلم!! هههه
هادو المقادير اللي درت
خضرة مشكلة: بطاطا، جزر، فلفلة
كاس ديال الروز مسلوق
كيلو ديال الحوت مغسول ومنقي ومحيدا ليه القشرة ديالو ومطحون فطحانة ديال اليد
زيتون احمر وحامضة مصيرة
عطرية: اسكنجبير، ابزار، كمون، ملح، تحميرة حارة وحلوة، اوراق سيدنا موسى، خرقوم بلدي وعادي،
بصلة مقطعة دوائر
حك ديال الطماطم المصبرة
عويدات ديال الربيع
شوية ديال الربيع والمعدنوس مفرومين و4 فصوص ديال الثومة محكوكين
3 ديال المطيشات محكوكين
زيت العود
عصير نصف حامضة
الطريقة:
نخلطو الحوت المطحون، الروز، الربيع، الثوم، والعطرية الا اوراق سيدنا موسى
ونخليو الخليط شي نص ساعة بالثلاجة
وناخدو الطجين، نستفو فيه دوك العويدات
ونديرو فوقها البصلة
ومن بعد الخضر ديالنا
وندردرو عليها شوية ديال العطرية
وكاس ديال الماء ونديروها فوق العافية شي 15 دقيقة
نصاوبو كويرات ديال الحوت
ونستفوها فالطجين
ونزيدو الجزر
هنا خلطت الماطيشة ديال الحك مع المطحونة
وزدتها على الطجين ديالي
وزدت وريقات سيدنا موسى
والحامض المصير والزيتون وصآآآآآآفي
ونخليوه يطيب وهاهو واجد
وبالصحة والراحة
اللهم ادمها نعمة واحفظها من الزوال يارب
tbark allah "lik
ردحذف