اليوم قررت نحط هاد الشوربة او الحساء اللي مختلف على الموجود بالنت بالنسبة للطريقة ديالها وكتجي روعة متشبعيش منها
نبداو فالمقادير:
دجاج الموجود عندنا وحسب الرغبة
فطر
شوية الربيع والمعدنوس
2 ضامات ديال البنة
ملح ابزار
معلقة كبيرة ديال الزبدة
ساشي نيدو
2 معالق مايزينا او دقيق حسب المتوفر عندنا
5 ديال الكيسان ديال الماء
الطريقة:
ناخدو كوكوط ونديرو فيها اللحم مقطع طريفات مع الكيسان ديال الماء وضامة وحدة ديال البنة
ونخليوه يطيب شي 10 من بعد مايغلى الماء
مللي يطيب نديروه فمولينكس
ونطحنوه مع شوية من الماء ديالو غير الجهد اللي يدور لينا الطحانة ونحتافظو بالباقي
ناخدو كوكوط ونديرو فيها ملعقة الزبدة وقبصة ملح
او بلاش حسب الرغبة ( نراعيو الملح لانو عندنا 2 ضامات ديال البنة وفيهم الملح كفاية)
مللي تذوب الزبدة، نزيدو 2 معالق مايزينا او الدقيق ونحركو شوية
ومن بعد نزيدو الماء اللي طيبنا فيه الدجاج، (هادي طريقة صلصلة البيشاميل) ونحركو مزيان على نار مهيلة،
ونزيدو عليها مسحوق نيدو
وشوية ابزار
ونزيدو عليها الفطر
والربيع والمعدنوس المفروم
والدجاج المطحون والضامة المتبقية
وندوروها فوق العافية شوية وهاهي وجدات
وبالف صحة وراحة
انـــاقة و جمـــال
